प्रमाणमा आधारित नीति अनुसन्धानका लागि मध्यपश्चिम विश्वविद्यालयको नीति प्रयोगशाला परियोजना शुभारम्भ

संयुक्त राष्ट्रसंघीय विकास कार्यक्रम अन्तर्गत सञ्चालित प्रदेश तथा स्थानीय शासन सुदृढीकरण कार्यक्रमको सहयोगमा मध्यपश्चिम विश्वविद्यालय नीति प्रयोगशाला मार्फत सञ्चालन हुने प्रमाणमा आधारित नीति अनुसन्धान परियोजनाको किक-अफ बैठक असार ३२ गते धुलिखेल, बनेपामा सम्पन्न भएको छ।

कार्यक्रममा युएनडिपी, मध्यपश्चिम विश्वविद्यालयसहित चार विश्वविद्यालयका प्रतिनिधिहरू तथा विभिन्न सरोकारवालाहरूको सहभागिता रहेको थियो। बैठकले नेपालको संघीय शासन प्रणालीलाई थप प्रभावकारी, जवाफदेही तथा प्रमाणमा आधारित बनाउन विश्वविद्यालयहरूको अनुसन्धान क्षमता, नीति संवाद तथा सरकारी निकायसँगको सहकार्यलाई सुदृढ गर्ने उद्देश्य लिएको छ।

युएनडिपी र मध्यपश्चिम विश्वविद्यालयबीच सम्पन्न सहमति पत्र अनुसार परियोजना ८ जुलाई २०२६ देखि ३० जुन २०२८ सम्म सञ्चालन हुनेछ। परियोजनाका लागि युएनडिपीले आर्थिक सहयोग उपलब्ध गराउनेछ। परियोजनाअन्तर्गत मध्यपश्चिम विश्वविद्यालयमा नीति प्रयोगशालालाई संस्थागत रूपमा सुदृढ गर्दै संघीय शासनसम्बन्धी अनुसन्धान, तथ्याङ्क सङ्कलन, विश्लेषण, नीतिपत्र निर्माण, प्रदेश तथा राष्ट्रियस्तरका नीतिगत संवाद, युवा तथ्याङ्क दूतको क्षमता विकास तथा अनुसन्धानका निष्कर्षलाई प्रत्यक्ष रूपमा सार्वजनिक नीतिसँग जोड्ने कार्यहरू सञ्चालन गरिनेछन्।

बैठकमा अन्तरसरकारी सम्बन्ध, वित्तीय संघीयता तथा आन्तरिक स्रोत परिचालन, डिजिटल शासन तथा लैङ्गिक समानता, सामाजिक समावेशीकरण र जवाफदेहिताका विषयलाई अनुसन्धानका प्राथमिक क्षेत्रका रूपमा अघि बढाउने विषयमा छलफल भएको थियो। सहभागी विश्वविद्यालयहरूले यीमध्ये एक–एक विषयगत क्षेत्रमा नेतृत्व गर्दै अनुसन्धानलाई नीति सुधारसँग जोड्ने प्रतिबद्धता व्यक्त गरेका थिए।

यस अवसरमा मध्यपश्चिम विश्वविद्यालयका उपकुलपति सह-प्रा. ई. डा. राजन सुवालज्यूले परियोजनाको प्रभावकारी कार्यान्वयनका लागि सहभागितामूलक दृष्टिकोणलाई प्राथमिकतामा राख्नुपर्ने बताउनुभयो। विश्वविद्यालय, सरकारी निकाय, अनुसन्धानकर्ता, विद्यार्थी तथा समुदायबीचको सहकार्यबाट मात्र अनुसन्धानलाई व्यवहारिक नीति सुधारमा रूपान्तरण गर्न सकिने उहाँको भनाइ थियो। उहाँले मध्यपश्चिम विश्वविद्यालयको नीति प्रयोगशालालाई दीर्घकालीन अनुसन्धान, नीतिगत संवाद तथा ज्ञान व्यवस्थापनको उत्कृष्ट केन्द्रका रूपमा विकास गरिने उल्लेख गर्दै अन्य विश्वविद्यालयहरूलाई नीति प्रयोगशालाको अवलोकन गर्न, अनुभव आदानप्रदान गर्न तथा दिगोपना र व्यावसायिक सहकार्यका लागि मध्यपश्चिम विश्वविद्यालयसँग सहकार्य गर्न आग्रह गर्नुभयो।

त्यसैगरी, मध्यपश्चिम विश्वविद्यालयका अन्तर्राष्ट्रिय सम्बन्ध निर्देशनालयका कार्यकारी निर्देशक तथा नीति प्रयोगशालाका संयोजक डा. यदुप्रसाद ज्ञवालीज्यूले नीति प्रयोगशालाले राष्ट्रिय तथा अन्तर्राष्ट्रिय स्तरमा विश्वविद्यालयको पहिचान र दृश्यता अभिवृद्धि गर्ने विश्वास व्यक्त गर्नुभयो।उहाँले बदलिँदो विश्वव्यापी अनुसन्धान प्रवृत्तिअनुसार विश्वविद्यालय, अनुसन्धान संस्था तथा अन्तर्राष्ट्रिय साझेदारहरूसँग सहकार्य विस्तार गर्दै नीति प्रयोगशालालाई अनुसन्धान तथा विकासको सक्रिय मञ्चका रूपमा अघि बढाइने बताउनुभयो।

प्राध्यापक, अनुसन्धानकर्ता, विद्यार्थी तथा युवा विद्वानहरूको सक्रिय सहभागितामार्फत प्रमाणमा आधारित अनुसन्धानलाई नीति निर्माण र सुशासनसँग जोड्दै समाजमा सकारात्मक परिवर्तन ल्याउने दिशामा नीति प्रयोगशाला प्रतिबद्ध रहेको उहाँले उल्लेख गर्नुभयो। कार्यक्रममा सहभागीहरूले विश्वविद्यालयमा आधारित नीति अनुसन्धानलाई सरकारी नीति निर्माण प्रक्रियासँग जोड्ने, प्रमाणमा आधारित निर्णय प्रणालीलाई संस्थागत गर्ने तथा संघीय शासन सुदृढीकरणमा विश्वविद्यालयहरूको भूमिका अझ प्रभावकारी बनाउने विषयमा जोड दिएका थिए।